Եվրոպայի խորհրդի Նախարարների կոմիտեն մարտի 9-11-ի ընթացքում տեղի ունեցած հանդիպման ընթացքում կրկին հստակ և վճռական կոչ է արել Ադրբեջանի իշխանություններին անհապաղ կատարել Մարդու իրավունքների եվրոպական դատարանի (ՄԻԵԴ) կողմից կայացված վճիռները, մասնավորապես՝ «Մակուչյանն ու Մինասյանն ընդդեմ Ադրբեջանի» գործով։
Այս գործը վերաբերում է 2016 թվականին Ադրբեջանի կողմից հայ սպա Գուրգեն Մարգարյանին դաժան սպանության ենթարկած Ռամիլ Սաֆարովի ազատ արձակմանը և հերոսացմանը։ Նախարարների կոմիտեն արձանագրել է, որ Ադրբեջանի իշխանությունները շարունակում են չվերսկսել երկխոսությունը և համագործակցությունը տվյալ գործի կատարման հարցում, ինչը լուրջ մտահոգություն է առաջացնում։
Կոմիտեն հատկապես նշել է, որ Ադրբեջանի իշխանությունները պետք է առանց հետագա հապաղման վերսկսեն կառուցողական երկխոսությունը Կոմիտեի և Եվրոպական դատարանի Քարտուղարության հետ՝ լիարժեք, արդյունավետ և անհապաղ կատարելով ՄԻԵԴ-ի բոլոր վճիռները։
Այնուամենայնիվ, Նախարարների կոմիտեն ափսոսանքով արձանագրել է, որ Ադրբեջանի իշխանությունների կողմից մի քանի նիստերի ընթացքում իրենց պարտավորությունները կատարելու հարցում որևէ շոշափելի առաջընթաց չի գրանցվել։
Հիմնական պահանջները, որոնք կոմիտեն կրկին ներկայացրել է Ադրբեջանին․
Անհապաղ վերսկսել երկխոսությունը Եվրոպայի խորհրդի կառույցների հետ։
Հստակեցնել դիրքորոշումը «այլ արտոնությունների» չեղարկման վերաբերյալ, ինչպիսիք են Ռամիլ Սաֆարովին աշխատավարձի վճարումը և բնակարանի տրամադրումը։
Հեռացնել Ադրբեջանի նախագահի աշխատակազմի կայքից Ռամիլ Սաֆարովին ներում շնորհելու և հանցագործին ազատ արձակելու օգտին ներկայացված նամակները։
Ապահովել, որ ապագայում ցանկացած գործողություն՝ ուղղված քրեական պատժից ազատվելու կամ անձին անպատժելիություն շնորհելու, իրականացվի Կոնվենցիայի պահանջներին լիովին համապատասխան։
Ձեռնարկել օրենսդրական բարեփոխումներ և հաշտեցման միջոցառումներ՝ հայերի նկատմամբ թշնամանքը հաղթահարելու և վերացնելու նպատակով։
Նախարարների կոմիտեն հորդորում է Ադրբեջանի իշխանություններին անհապաղ ներկայացնել տեղեկատվություն առկա չլուծված հարցերի վերաբերյալ՝ որպես ժամկետ սահմանելով 2027 թվականի մարտի Նախարարների կոմիտեի նիստը։
