ՀՀ հակակոռուպցիոն դատարանում շարունակվում է Գյումրու քաղաքապետ Վարդան Ղուկասյանի գործը, որում նա մեղադրվում է կաշառք ստանալու մեջ։
Գործի նյութերի համաձայն՝ Վարդան Ղուկասյանը և Գյումրու գլխավոր ճարտարապետ Հենրիկ Գասպարյանը, նախնական պայմանավորվածությամբ, իրենց իշխանական և ծառայողական լիազորությունները օգտագործել են՝ գործարար Սևակ Գոմցյանին պատկանող առևտրի և սպասարկման համար նախատեսված հասարակական նշանակության ինքնակամ կառույցն օրինականացնելու նպատակով։
Մեղադրյալներին մեղադրում են 4 միլիոն ՀՀ դրամ կաշառք գումար ստանալու մեջ։
Այսօր դատարանը հարցաքննության էր հրավիրել մեղադրյալներ Հենրիկ Գասպարյանին և Սևակ Գոմցյանին։ Գյումրու գլխավոր ճարտարապետը, որը երկար տարիներ աշխատել է Վարդան Ղուկասյանի հետ, հրաժարվեց ցուցմունք տալ։ Դատարանը որոշել է հրապարակել նրա նախաքննական ցուցմունքը։
Հիշեցնենք, որ Հենրիկ Գասպարյանը գործի մեկնարկից ի վեր տնային կալանքի մեջ է։
